ඇස්. මහින්ද හිමි (S.Mahinda Himi)

ජීවන තොරතුරු

ටිබෙට් ජාතික ඇස්.මහින්ද හිමියන් අපේ ජාතික වීරවරයකු ලෙස කිරුළු දරන්නේ අවිචාරවත් යුගයක සිංහලයන් වල්මත් වූවන් සේ හැසිරෙත්දී ජාතියට සිදුවන්නට යන විපත අවබෝධ කරගෙන අභිමානවත් ජාතියක් යළි ඇති කිරීමට මහත් උත්සාහයෙන් කටයුතු කළ නිසාය. වර්ෂ 1901 ටිබෙට් දේශයේ ‘සිකිම්‘ යන ප්‍ර‍දේශයේදී එතුමා උපත ලැබීය. ගිහි ජීවිතයේදී ඇස්.කේ. තෂ්නිම්ගල් නම් වූ ඔහු ශ්‍රී ලංකාවට පැමිණියේ එවකට පැවිදි භාවය ලබා සිටි තම වැඩිමහල් සොහොයුරා සමඟයි. ශ්‍රී ලංකාවට පැමිණි එතුමා මාළිගා කන්දේ විද්‍යෝදය පිරිවෙන්හි ශාස්ත්‍ර ඥානයෙන් පෝෂණය වූයේය. එහිදී පාළි හා සංස්කෘත භාෂා හදාරා ලබා ගත් භාෂා නෛපුන්‍යය උපයෝගි කොටගෙන එතුමා මහත් සේවාවක් ලක්දිව සාහිත්‍යය වෙනුවෙන් ඉටු කළේය. ඉංග්‍රීසින්ගේ ආධිපත්‍යය යටතේ මහත් පරාධීන හැඟීම් වලින් මැඬෙමින් සිටි සිංහලයාගේ ජාත්‍යානුරාගය නංවාලීම උදෙසා ඇස්. මහින්ද හිමියන් අතින් රචනා වුණු කවි පන්ති, ‍පොත් පත් සහ විවිධ ලිපි ලේඛන ආදිය අතිමහත්ය.

නිදාසිටි සිංහලයා ජාත්‍යානුරාගයෙන් මත් කොට අවදි කර ලීමට මහින්ද හිමියන්ගේ පෑන් තුඩ මෙහෙයවුණු ආකාරයට නිදසුනක් පහත දැක්වේ.

මොන කරුමය ද තව ඇහැරුණු බවක්       නැහැ

පැන පැන බියව මුළු වැදුමෙන් පලක්         නැහැ

දිනුමත් පැරදුමත් කෝකත් කමක්             නැහැ

එනු ඉදිරියට පැන ගොස් නිදහසක්             නැහැ

පරාධීනව සිටි සිංහල ජාතිය පුබුදුවාලීමේ මහඟු කර්තව්‍යයට උර දෙමින් කටයුතු කළ ටිබෙට් ජාතික ඇස්. මහින්ද හිමියන් තුළින් උපතින් විදේශිකයකු වුවද සැබෑ සිංහලයකු සතු ගති ලක්ෂණ මොනවට විද්‍යමාන විය.